Çутă классем ачасене кĕтеççĕ

Районти шкулсенче вĕренÿ çулне хатĕрленес ĕç кал-кал пы­рать. Тĕслĕхрен, Нагадак шкулĕнче сентябрĕн 1-мĕшĕ тĕлне чÿречесене пурне те улăштарĕç, этажсем хуш­шинчи алăксем лартĕç.

- Пирĕн шкула 1976 çулта туса лартнă, нумай япалана çĕнетмелле, - каласа парать Наркас Мухаметова директор. – Эпир чÿречесен пĕр пай­не Вырăнти пуçарусене пулăшмалли программа тăрăх виçĕ çул каялла улăштартăмăр. Пуçланă ĕçе вĕçне çитерес тесе, кăçал эпир Программăна каллех лекме пултартăмăр. Халĕ шкул çуртĕнче пĕтĕмпе пластик чÿречесем лартăпăр. Çакăнсăр пуçне, юлнă укçапа этажсем хушшинчи алăксене улăштарма йышăну турăмăр.

Проекта финанслама республика 1 млн та 350 пин тенкĕ уйăрса панă, район администрацийĕ тата спонор („Салават” ХФХ ООО директорĕ Ва­силий Федоров) 100-шер пин тенкĕ хывнă, ял çыннисем хăйсем 100 пин тенкĕ пухнă.

Уфа хулинчи подрядчик - „Аль­бит” ООО – виçсе кайнă та ĕнтĕ. Çывăх вăхăтра 46 чÿрече блокĕ тата пилĕк алăк вырнаçтарса лартĕç. Ĕçсене пурне те Пĕлÿ кунĕ тĕлне вĕçлеме планлаççĕ. Шкулта 111 ача вĕренет, вĕсем çак куна çĕнетнĕ çутă классенче кĕтсе илĕç.