Аургазă хыпарçи
+17 °С
Пӗлӗтлӗ
Пур хыпар та
Медицина
19 Июнӗн 2020, 17:00

Министр тав туни

Республикăра пысăк хатĕрлĕх режимне майĕпен чакарма тытăннă. Çынсене улăх-вăрманта, шыв-шур таврашĕнче кан­ма, спорт залĕсене çÿреме, пĕр чăрмавсăр урама тухса çÿреме ирĕк панă, çавăн чухне перчетке тăхăнмасан та юрать. Анчах коронавирус пандемийи вăхăтĕнче малти ретре тăнă тата халĕ те тăракан медиксемшĕн пĕтĕмпе унчченхи пекех юлать. Вĕсем covid-госпитальсенче халĕ те икшер эрне дежурствăра тăраççĕ. Вĕсенчен пĕри – Толбазăри районăн тĕп больницин çамрăк ин­фекционист врачĕ Надежда Петрова.

Надежда Александровна районта коронавирус инфекцийĕпе кĕрешес енĕпе çул уçакан пулса тăнă тесе калама пулать. Вăл хăрушă усло­висенчен пăрăнман, covid-19 чирлĕ тата чир ертнĕ тесе шухăшлакан аургазăсене пĕрремĕш пулса си­племе тытăннă. Халĕ 26 çулхи спе­циалист районти тĕп больницăн инфекци госпитальне виççĕмĕш хут вахтăна тăнă. Врач „хĕрлĕ зонăра” госпитальти медработниксенчен пу­ринчен те нумайрах – 40 кун ытла – ирттернĕ. Çавăншăн район боль­ницин ертÿçисем ăна „РФ Сывлăх сыхлав министрĕ тав туни” награда илме тăратнă.
Виçĕ çул каялла, Пушкăрт госу­дарство медицина университетне пĕтернĕ хыççăн, Çĕнĕ Федоровкăра çуралса ÿснĕ хĕр тăван кĕтесне таврăннă, „Земство врачĕ” про­грамма участникĕ пулса тăрса, Толбазăри районăн тĕп больницин­че ĕçлеме пуçланă. Унăн икĕ пĕчĕк ача пур. Кĕçĕн хĕрачи часах икĕ çул тултарать, асли тăваттăра. Çамрăк хĕрарăм хăйĕн çывăх çыннисене вăрахчен курмасан хĕн пулни çинчен калать. Телефонпа шăнкăравлани çеç çителĕксĕр, вĕсемпе юнашар пулас килет. Упăшкине ыталас, ытарма çук хĕрачисене чуптăвас, хунямăшĕпе калаçас килет, вăл кинне питĕ пулăшать вĕт. Смена тăршшĕпе мăнукĕсене асламăшĕ пăхать. Упăшки, Александр, МЧСра ĕçлет.
Врач професси уявне çемйипе мар, пациентсем хушшинче кĕтсе илет пулин те, Надежда кулянмасть. Медиксем хăйсен вăхăтне тата вăйне парса, усал вируспа кĕрешеççĕ, пациентсен сывлăхне сыхласа хăвараççĕ вĕт, çакă, паллах, хисе­пленине тата тав тунине тивĕçлĕ.
Толбазă госпиталĕнче COVID-19 чирлĕ тата унпа чирлĕ тесе шухăшлакан 30 çынна сыватнă.
Читайте нас: