Январĕн 25-мĕшĕ – Татьяна кунĕ

Аургазăри Татьяна Ларинана (фотоÿкерчĕк çинче) кунта ача сачĕн пĕр улшăнми заведующийĕ пек пĕлеççĕ. Вăл Степановкăри ачасене 37 çул тăршшĕне воспитани панă. Татьяна Николаевна халĕ тивĕçлĕ канура, анчах хăй ача садĕнче ĕçленĕ çулсене ăшшăн тата кăшт хумхантаракан тунсăхпа аса илет. Ĕçе пула ăна тăван вырăнĕнчен тата çемйинчен пиншер километра тухса кайма тивнĕ вĕт.

Вăл Мускав облаçĕнче Татьяна кунĕ умĕн январьти хаяр сивĕ кунхине çуралнă. Ашшĕпе амăшĕ хăйсен хĕрне асап тÿснĕ çветтуй ятне панă. Çемьере виçĕ ача ÿснĕ. Амăшĕ колхозра ĕçленĕ, çемье пуçĕ – чугун çул çинче. Ача чухне Таня кĕçĕннисене пăхма юратнă, вĕсемпе пĕр чĕлхе çăмăл тупма пултарнă. Професси суйласа илме вăхăт çитсен вăл, шухăшласа тăмасăрах, документсене педагогика техникумне панă. Вĕренÿ вĕçленнĕ хыççăн выпускниксене союзлă республикăсене ĕçлеме янă. Пушкăрт çĕрне вунпĕр çамрăк воспитатель килнĕ, вĕсем хушшинче вăл та пулнă. 1974 çулхи кĕркунне Степановка ялĕнчи ача сачĕн алăкĕ урлă пĕрремĕш хут ярса пуснă, унта ăна вăтăр çул ытла заведующи пулса ĕçлеме пÿрнĕ.
- Халĕ те мĕнпурĕ асра. Ача сачĕн çурчĕ çĕнĕччĕ, ăна тирпей-илем кĕртсе пĕтерменччĕ, кăмака хутса ăшăтмаллаччĕ. Пысăк пÿлĕмсем ăшă тытмастчĕç. Эпĕ çуралнă вырăнта ача сачĕсем урăхлаччĕ. Ял çыннисем ачисене хĕлле ача садне çÿретмессе тăрăшатчĕç, çавăнпа вĕсем сахалччĕ. Эпир унта ăшă тумтирпе тата çăматăпа ĕçлеттĕмĕр. Паллах, малтанхи вăхăтра пăрахса каяс килетчĕ. Анчах эпĕ майĕпен ĕçе хăнăхрăм. Мана коллективпа ăнчĕ. Вăл пысăк мар пулин те – воспитатель, няня тата повар, анчах пĕр шухăшлăччĕ. Эпир мĕнле те пулин ĕçе тытăнсан, ăна пурте пĕрле тăваттăмăр. Группăсенче хăтлăх тума тытăнтăмăр, пÿлĕмсен стенисене çутă тĕспе сăрларăмăр, тĕрлĕ ÿкерчĕксемпе илемлетрĕмĕр. Эпир ачасемшĕн тата вĕсен ашшĕ-амăшĕсемшĕн хатĕрлекен уявсене асран кайми тума тăрăшаттăмăр, сценарине кашни хутĕнче мĕн-тĕр çĕннине, хăйне евĕрлине кĕртеттĕмĕр. Эпĕ Çĕнĕ çул уявĕнче Хĕл Мучи пулаттăмччĕ! Чăн-чăн юмах пулса тухатчĕ! Вăхăт иртнĕçем, ачасене шкул программине хатĕрлеме пуçларăмăр. Ун чухне нумайрах ача çÿреме тытăнчĕ, - аса илет Татьяна Николаевна.
Вăл хальхи ача сачĕсенче çитĕнсе пыракан ăру валли условисене пурне те тунăшăн савăнать. Анчах, ача лайăх аталантăр тесен, унпа ăшшăн тата туслăн хутшăнмалла, ăна ăнланма пĕлмелле, уншăн хăйне унпа тунсăхлă мар, лайăх тата лăпкă туймалли тăван çын пулса тăмалла. Пирĕн сăнар ушкăнра шăпах çавăн пек хутлăх йĕркелеме тăрăшнă.
Вăл Пушкăрт çĕрĕнче хăйĕн мăшăрне тĕл пулнă, упăшкипе, Владимирпа, икĕ ача пăхса ÿстернĕ. Шел пулин те, мăшăрĕ темиçе çул каялла вилнĕ. Татьяна ывăлĕпе, Сергейпе, пурăнать, вăл район центрĕнче парикмахерта ĕçлет. Хĕрĕ, Ирина, çемйипе Стерлитамакра пурăнать. Кукамăшĕн чун уççи – виççĕмĕш класра вĕренекен мăнукĕ.