Пĕрремĕш кандидата регистрациленĕ

Ку вăл – Радий Хабиров, 2018 çулхи октябрьтен вара регион Пуçлăхĕн тивĕçĕсене вăхăтлăха пурнăçлаканĕ.

Вăл суйлав умĕнхи дебатсене хутшăнма тата активлă суйлав кампанийĕ илсе пыма шутламанни çинчен пĕлтернĕ. Мĕншĕн тесен халăх вăл мĕнле çын пулнине тата мĕнле ĕçленине çак вăхăт хушшинче çителĕклĕ сăнанă. Урăхла каласан, тунă ĕçсемпе çитĕнÿсем ун çинчен çивĕчĕрех пĕлтереççĕ.

Пушкăртстан Пуçлăхĕн тивĕçĕсене вăхăтлăха пурнăçлаканĕ Радий Хабиров, ăна „Единая Россия” парти тăратнă, республика Пуçлăхĕн должноçне пĕрремĕш кандидат пулса регистрациленнĕ. Унăн штабĕ Тĕп суйлав комиссине муниципаллĕ депутатсен 476 алă пустарнине тăратнă. Вĕсем пурте чăн пулнине палăртнă. Тĕп суйлав комиссийĕн председателĕ Илона Макаренко кандидата удостоверени панă, ларăвăн участникĕсем пурте тăвăллăн алă çупнă.

Регион Пуçлăхне сентябрĕн 8-мĕшĕнче суйлăпăр. Ку должноçа 13 кандидат тăратнă. Регистраци июлĕн 21-мĕшĕнче вĕçленĕ.