Канмалли куна – йĕлтĕрпе

Аургазăсем иртнĕ канмалли куна хаваслă тата чĕрĕ пуçларĕç, кăмăла çĕклекен музыка янранă май участниксем пурте заряд­ка турĕç. Унтан йĕлтĕрçĕсем кану паркне çул тытрĕç, трасса çавăнта вырнаçнă. Кунта ачасен, яшсен тата хĕрсен, арçынсен тата хĕрарăмсен старт чупăвĕсем иртрĕç. Ăмăртăва шкулсенче вĕренекенсем, нумай профиллĕ колледж студенчĕсем тата преподавателĕсем, шкулсен тата ача сачĕсен коллективĕсем, культура пайĕн, „Çемье” центр, район администрацийĕн, „Пищевик” ПО, „Ростелеком” сотрудникĕсем, спорт ветеранĕсем хутшăнчĕç.

Спортсменсем, команда па­рассине кĕтсе, старта хатĕрленсе тăчĕç. Йĕлтĕр йĕрĕпе малтан чи çамрăк участниксем ыткăнчĕç. Ыттисем шăм-шакне çемĕçтерчĕç, кашни лайăх результат кăтартма ĕмĕтленчĕ. Толбазă ялĕнчи 1 №лĕ ача сачĕн коллективĕ шкулчченхи вĕренÿ учрежденийĕсем хушшин­че чи активли пулса тухрĕ. „Атте, анне тата эпĕ – спорта юрата­кан çемье” эстафета результачĕсемпе Семен ялĕнчи Ишбулдин­сен çемйине спортпа чи тусли тесе йышăнчĕç. Толбазă ялĕнче пурăнакан сакăрвунă çулхи Николай Орлов кăçал ÿсĕмĕпе чи аслă участник пулчĕ, чи çамрăкки – Семен ялĕнчи ултă çулхи Амина Камалетдинова.

Финиша чи малтан килсе çитрĕç: 8-9 классем хушшинче – Павел Пав­лов (Бишкаин ялĕ), Альфина Боль­шакова (Мурадăм); 10-11 классем – Дмитрий Трофимов, Александра Артемьева (Бишкаин); 30 çулчченхи ÿсĕмрисем категорийĕнче – Леонид Кириллов (Семен), Нэркэс Кильдина (Мурадăм); 40 çулчченхи – Сулпан Сат­лыков (Толбазă), Венера Ишбулдина (Семен); 50 çулчченхи – Николай Петров (Меселпуç ялсовечĕ), Зульфия Сидоро­ва (Толбазă); 60 çулчченхи – Зульфат Рамазанов (Мурадăм), Тамара Кузьми­на (Таштамак); 60 çултан аслăраххисем – Виталий Федоров (Шланлă), Мунира Мавзютова (Толбазă). Çĕнтерÿçĕсене тата призерсене пурне те медальпе тата грамотăпа наградăларĕç.

Аургазăри çĕр ытла çын хăйĕн кан­малли кунне йĕлтĕр çинче ирттерчĕ. Нумайăшĕ пысăк ушкăнпа – çемйипе, тусĕсемпе е ĕçтешĕсемпе – килнĕ.

Справка