+18 °С
Пӗлӗтлӗ
Пур хыпар та
Общество
16 Апрелӗн 2021, 15:40
Тупра
Александр САВЕЛЬЕВ-САС
Кунта тиха чухне вăл чупнă
Ирпе‚ каçпа та кăнтăрла.
Сых ячĕшĕн хуçийĕ çакнă
Мăйне янравлă танкăрма.
Кайран чухланă: мĕн вăл хăмăт?
Мĕскер вăл вăрăм урапа?
Пăрлак çулпа та утнă хăвăрт
Хĕлле таканлă урапа...
Паян хистет пилеш хуллийĕ
‚Çук канăç кăнтăрла‚ çĕрле:
Таçта васкать-çке ун хуçийĕ
Тупасшăн тем таçти çĕрте.
Çул вăрăм пуль тиевлĕ лавăн‚
Чухлатăп эпĕ мĕншĕнне:
Сĕм тĕттĕм каç пек тикĕт лакăм
Сулкаланать енчен енне.
Лавçин куçсем çиçеç кăваррăн‚
Вăй пур ун‚ пур ун ĕмĕт те‚
Ăна эп çийĕнчех палларăм:
Ку - манăн ватă асатте.
Хĕрарăмăн пит пысăк терчĕ‚
Пĕрмай пăхать вăл кай енне.
Чĕрем карт! турĕ те систерчĕ:
Ку - манăн ватă асанне.
Капмар ларать çăка çÿпçийĕ
‚Çул урлă ÿкнĕ ун мĕлки.
Унта - хĕрарăмăн туприйĕ:
Тĕрри‚ хушпу та пир тĕрки.
Пурах унта ик-виçĕ калăп‚
Чикнех çут вĕçлĕ шĕшлине...
Ăçта кайсассăн та‚ мĕн калăн‚
Илес пулать чи кирлине.
Пĕрлех пулсассăн пурнăç çулĕ
Сăпка та кирлĕ-çке ара.
Тен‚ эпĕ хам та сикнĕ пулĕ
Шăпах çав сарă сăпкара....
Утать тур ут пуçне ухмасăр
Пилеш хулли‚ канма памасăр‚
Час-час вистет йĕпе тире.
Ак илтĕнсе тăрать пĕр хушă
Чĕрешĕн çывăх кĕвĕ те.
Эппин‚ манман илмешкĕн юрă
Хăйпе пĕрле ман асатте.
Илтетĕп чĕвĕлти чĕкеçĕн
Ик çын чунтан калаçнине.
Тавах Турра пĕрле илнишĕн
Тăван сăмахăн çÿпçине....
Паян та эп пуçа таятăп
Ват асаттемĕн тăприне.
Урал таран илсе килнишĕн
Чăвашăн пĕтĕм туприне.
Читайте нас:
© 2020-2024 Сайт издания "Аургазă хыпарçи" Администраци çырулла килĕшÿ парсан çеç сайтри информацин копине тума юрать
Телефон
834745 (2-18-45)
Электронлă почта
Адрес
453480, Аургазинский район, с.Толбазы, ул.Первомайская,10
Реклама пайĕ
834745 (2-01-67)
Редакци
834745 (2-18-45)
Кадрсен пайĕ
834745 (2-18-51)