Кинори пекех...

Театр тата кино актерĕ Евгений Ибра­гимов – пирĕн район çынни, „Инспектор Купер. Невидимый враг” детективлă сериалта вылянă. Çамрăк çын Стер­литамак хулинче çуралнă. 2001 çулта, Женя вунпĕр тултар­сан, вĕсен çемйи пирĕн районти Шĕвĕрлĕ ялне пурăнма куçнă. Пулас актер Шланлăри вăтам шкула пĕтернĕ. Унтан Пушкăрт культура тата искусствăн республи­ка колледжĕнче арти­ста тата театр поста­новкисен режиссерне вĕреннĕ. Çавăн хыççăн Санкт-Петербургри те­атр искусствин госу­дарство академийĕнче малалла пĕлÿ илнĕ.

Евгений каланă тăрăх, актер профес­синче уншăн чи кирли – уçă кăмăллăх, пурин­чен малтан, хăвăнпа ху çапла пулни. Унăн ăнăçу вăрттăнлăхĕнче – 1 процент талант, 99 процент ĕç - тăрăшса ĕçлени çеç результат тума пулăшать. Вылякан сăнарсем урлă хăйĕн гражданла шухăшне куракансем патне çитерме тăрăшать. 2019 çулта актер „Ду­блер” фильмра тĕп сăнара вылянă.