Кĕçĕн Нагадак ялĕнчи Матвеевсен çемйинче пилĕк ывăл. Асли икĕ çул каярах çарта служба иртсе килнĕ. Кăçал тата тепĕр ывăлне – Вадима – çара ăсатнă. Нумаях та пулмасть салтака Инçет Хĕвелтухăçне куçарнă, çавăнччен пилĕк уйăх тăршшĕне вăл Ульяновск хулинче çар наукин пуçламăшĕсене алла илнĕ. Çар чаçĕн командованийĕнчен тав çырăвĕ илсен ашшĕпе амăшĕн, Андрей Александровичпа Лира Георгиевнан, чĕрисем уйрăм мăнаçлăхпа тулнă. Çырура боец çыхăну çар техникине тĕпчессинче тăрăшулăх, ăслă-тăнлă пуçарулăх тата тимлĕх кăтартнине палăртнă.
- Çирĕп ыйтни, дисциплинăллă пулни тата хушнă ĕçе яланах пурнăçлани Матвеев Вадим рядовойăн кулленхи ĕçĕнче ыттисенчен уйăрса тăракан енсем пулса тăнине уйрăм палăртатăп. Паян эсир хăвăрăн ывăлăрпа, Тăван çĕршывăн тивĕçлĕ хÿтĕлевçипе, тивĕçлипе мăнаçланма пултаратăр, - çырнă çырура.
Нагадакри шкулта тăххăрмĕш класс пĕтернĕ хыççăн Вадим Стерлитамакри строительство техникумĕн студенчĕ пулса тăнă. „Салават” ХФХ ОООра практика иртнĕ, кунтах çемье пуçĕ механизатор пулса ĕçлет. Лира Георгиевна – кил хуçи арăмĕ, арçынсем ĕçре чухне картиш тулли килти выльăх-чĕрлĕхе пăхать. Ĕнесем, вăкăрсем, сурăхсем, сыснасем, чăхсем, лаша – çакăн пек хуçалăхра пурин валли те ĕç çителĕклĕ. Пысăк çемьере ачасем мĕн пĕчĕкрен ĕçе вĕренсе ÿсеççĕ, пĕрремĕш класра вĕренекен чи кĕçĕн ывăлĕ те ашшĕ-амăшне пулăшать. Пиччĕшĕпе шăллĕсем тата тăванĕсем пурте Вадим салтакран таврăнасса кĕтеççĕ, ун çине пысăк шанăç хураççĕ.