Аургазă хыпарçи
+22 °С
Уҫҫӑнах
Пур хыпар та
Общество
9 Декабрӗн 2020, 14:00

Хăвăн тымарусене пĕлсе çит

Районти Г. Ибрагимов ячĕллĕ тĕп библиотекăра чăваш культури­не халалланă литература-творче­ство сехечĕ иртрĕ. Библиотекарь­сем çапла Пушкăртстан халăхĕсене халалланă мероприятисен ярăмне уçрĕç.

Тĕлпулăва Çĕнĕ Федоровкăри ялти библиотекаре Галина Алексеевана, аслă классенче вĕренекен Ираида Степанова­на тата Ольга Никитинана йыхравланă. Вĕсем куракансене гунн несĕлĕнчи çынсен пурнăç йĕркипе тата йăлисемпе паллаштарчĕç, чăваш халăх тумĕн элеменчĕсем çинчен интереслĕ калав хатĕрленĕ. Чăвашсем хушпу валли тимĕр укçа пысăкăшне çеç мар, мĕнле янрани­не те пăхса суйласа илнĕ иккен.
- Ташланă чухне тата вăйă картинче вĕсем илемлĕ чăнкăртатчăр тесе, тимĕр укçасене ытла нăкă çĕлемен, - каласа пачĕ ял библиотекарĕ интереслĕ факт çинчен.
Халăх ăстисен творчествипе халĕ çĕнĕлле усăланаççĕ. Вăл инте­рьера илемлетмелли япала, сцена костюмĕ тата интереслĕ сувенир пек пирĕн çуртсене çĕнĕрен килсе кĕрет. Чăваш тĕрри вăрттăнлăхĕсене çĕнĕ ăрусене вĕрентеççĕ. Вунпĕрмĕш класра вĕренекен Ираида алĕçĕпе темиçе çул тăршшĕне кăсăкланать ĕнтĕ. Тĕлпулу йĕркипе вăл фатинран çĕнĕ çул елки тăвас енĕпе мастер-класс ирттерчĕ.
- Çакăн пек илемлĕ япаласем тума мана аппа вĕрентрĕ. Ун хыççăн эпĕ те тĕрлемелли тĕрлĕ меслетсене пĕлсе çитрĕм. Пĕчĕк япаласене темиçе кун хуш­шинче тăватăп, пысăккине тăвасси вара темиçе уйăха тăсăлать. Хам тунă япала­сене тăвансене тата туссене парнелетĕп. Хăшпĕр чухне заказсем те пулаççĕ, вара хобби тупăш кÿрет, - каласа пачĕ шкулта вĕренекен.
Пирĕн районта çырма тытăнакан чăваш поэчĕ пур. Вуннăмĕш класра вĕренекен Ольга мероприятинче кон­курса хăй çырнă поэма сыпăкне каларĕ. Тăван чĕлхе, хăйĕн тăван кĕтесĕ, çутçанталăк çинчен сăвăра хĕр тăван культурăна, хăйĕн халăхне тарăннăн юратни çинчен пĕлтерет.
- Мана таврари тĕнче, çутçанталăк тапхăрĕсем хавхалантараççĕ. Эпĕ чăваш литература классикĕ Константин Иванов евĕрлĕ çырма тăрăшатăп, мана шкулта çак ĕçре пулăшаççĕ, - терĕ вăл.
Тăван чĕлхине тарăннăн хисеплени­не Ольга ĕçпе çирĕплетсе парать. Вăл çак кунсенче вулавçăсен регионсем хуш­шинчи „Якку Ухсайне вулатпăр” онлайн-конкурсра пĕрремĕш вырăн йышăннă. Диплом ăна библиотекарьсем пачĕç.
Çаплах кĕнеке управçисем литера­тура-творчество сехечĕ йĕркипе чăваш культурине халалланă кĕнеке выставки хатĕрленĕ. Унпа пирĕн район библиоте­кинче кирек хăш вăхăтра та паллашма пулать.
Читайте нас: