Çĕр çинче ĕçлесси – унăн чун туртăмĕ

Василий Иванович пурнăç ăслăлăхне ачаранпа ăса илнĕ. Вăл хăйĕн ашшĕнчен çĕре, хресчен ĕçне хисеплеме тата юратма вĕреннĕ. Çĕр çинче ĕçлесси уншăн – чун туртăмĕ.

2006 çулта юбиляр фермер ĕçне тытăннă. Хуçалăх ятне – „Салават” – хăйĕн ашшĕпе амăшĕ советсен вăхăтĕнче ĕçленĕ колхоза халал­ласа панă. Халĕ унăн хресчен-фер­мер хуçалăхĕ – ăнăçлă аталанса пыракан предприяти, вăл экономи­ка кăтартăвĕсен ÿсĕмне çултан-çул кăтартать.

Ялхуçалăх предприятийĕнче выльăх-чĕрлĕх ĕрчетес тата ÿсентăран ÿстерес ĕç отраслĕсем лайăх хăвăртлăхпа ата­ланса пыраççĕ. Фермер хуçалăхĕ хура-ула ăратлă мăйракаллă шултра выльăх ĕрчетекен хуçалăх ятне илнĕ, ĕне фермисене реконструкциленĕ, халь­хи оборудованипе тата машинăсемпе тивĕçтернĕ. Халĕ кунта пысăк тухăçлă ăратлă выльăх-чĕрлĕх шучĕ хушăнса пырать, самăртмалли площадка ĕçлет.

Хуçалăхăн техника бази пысăк хăвăртлăхпа ÿссе пырать. „Салаватра” малта пыракан технологисен хакне пĕлеççĕ, уйрăмах ÿсентăран ÿстерес ĕçре. Нагадаксем „Башинком” на­ука тата çĕнĕлĕхе производствăна кĕртекен предприятипе çыхăнса ĕçлеççĕ, çулсерен пĕрчĕллĕ тата тех­ника культурисен пысăк тухăçне туса илеççĕ. Хуçалăх илнĕ пĕрчĕллĕ тата пăрçаллă тĕштырăсем реализациле­мелли сертификат селекци ĕçне илсе пыма тата вăрлăх сутма ирĕк парать.

Василий Ивановичăн авторитечĕ пысăк пулнипе хуçалăх республикăри ялхуçалăх продукцийĕн рынокĕнче тивĕçлĕ вырăн йышăнать. Питĕ ĕçлĕ пулнине пăхмасăр, „Салават” руководителĕ ялхуçалăх производ­ствине илсе пыракан территоринчи ял тăрăхĕсен обществăлла пурнăçне активлă хутшăнать. Вăл ялăн социаллă аталану программисене пурне те спонсор пулăшăвĕ парать, район­ти уяв мероприятийĕсене ирттер­ме пулăшать. Ĕç интересĕсене чун­тан парăнса тăнипе, ертÿçĕн пысăк пултарулăхĕпе, çынсене хисепленипе вăл ĕçтешĕсем тата халăх хушшинче тивĕçлипе авторитетлă пулса тăнă.