Пурнăçне чечексемпе илемлетнĕ

Чăваш Хурамал ялĕнчи Ксения Иванова (ÿкерчĕк çинче) хăйĕн килĕнче чечек тĕнчи тунă. Вăл герань кăна 15 тĕслине çитĕнтерет! Чечек хушшинче йăлтăркка çутă бегони, чаплă орхидейăсем, сансиверисем, спати­филлум... Çурчĕн мĕнпур чÿрече янахне чечексемлĕ кашпосем йышăннă. Вĕсене пурне те шăварма кил хуçи арăмĕ сахал мар вăхăт тăкаклать. Тĕрĕс, халĕ Ксенийăн килти пулăшаканĕсем – хĕрачисем – кăшт ÿснĕ. Вĕсенчен чи асли 9 çулта, кĕçĕнни нумаях та пулмасть иккĕ тултарнă. Хĕрачасен ячĕсем те чечек ячĕсене аса илтереççĕ: Гликерия, Глория тата Габриэлла. Упăшки, Вадим, хĕрарăмăн кăмăл еккине пур енĕпе те ырлать. Илем ытлашши пулмасть вĕт!

Ивановсем темиçе çул каялла Стерлитамак хулинчен хăйсен тăван кĕтесне куçса килнĕ, кунта юлма шутланă.

- Малтан ахаль чечексем çитĕнтереттĕм, унтан почтăпа вăрлăх çырăнса илме тытăнтăм. Кашни тĕсне мĕнле ÿстермелли çинчен нумай статья вуларăм. Чи кир­ли – тĕрĕс пăхасси: калчасене вăхăтра кăпкалатмалла, шăвармалла, кирлĕ чухлĕ çутă тумалла. Чечексем ÿсчĕр тата савăнăç кÿччĕр тесен чи пĕлтерĕшли – вĕсене юратмалла. Пĕтĕм чуна парса, эпĕ вĕсемшĕн нумай вăхăт тăкаклатăп. Ÿсентăрансем вара мана чаплă че­чексемпе савăнтараççĕ, - тет Ксения.

Вăл илем тăвас тесен, ăна ытлашши вăй хумасăрах тума пулнине шанать. Çапла пултăр тесен, çăтмахри пек сад лартмалла.