Хăйне урăхла шăпа суйламан

Галина Тимофеева Ташлăкуль ялĕнче çуралнă. Хĕрĕн ĕç биографийĕ Кировăри вăтам шку­ла пĕтерсен, вырăнти ялти клубра ĕçлеме тытăнсан, пуçланнă. Галина ĕç çине творчествăлла пăхнине пула çак культура вучахĕ кĕске вăхăт хуш­шинче нумай нациллĕ ялсоветĕнчи çынсемшĕн кану тата пĕлÿ саракан вырăн пулса тăнă.

1978 çулта Галина Васильев­на Уфари библиотека техникумне пĕтернĕ те Аургазă районĕн тĕп би­блиотекин литература комплектла­кан тата ĕçлесе хатĕрлекен пайне ĕçе вырнаçнă. Тĕп комплектатор, фондовик пулса ĕçленĕ, чĕрĕк ĕмĕр ытла çак пая ертсе пынă. Вăл библи­отека системин аталанăвне пысăк тÿпе хывнă.

Галина Тимофеева библиоте­ка ĕçне хăйĕн пурнăçĕн 40 ытла çулне панă. Вăл яваплă, тÿрĕ, çирĕп ыйтакан тата пысăк профессил­ле специалист пулнă, ăна районта хисеплеççĕ. Унăн активлă пурнăç позицийĕ кăмăла каять. Вăл культу­ра работникĕсен профсоюз райкомĕн председателĕ пулса çирĕм çул ытла ĕçленĕ. Тÿрĕ кăмăлпа ĕçленĕшĕн ăна РФ тата ПР Культура министер­ствисен тата культура работникĕсен профсоюзĕн Тĕп комитечĕн Хисеп грамотисемпе наградăланă.

Халĕ Галина Васильевна тивĕçлĕ канура. Çаплах активлă, хастар. Тата вăл питĕ лайăх кил хуçи арăмĕ. Çулла садĕнче чечексем ырă шăршă кăларса лараççĕ, пахчаçимĕç тата улма-çырла нумай пулать, сĕтелĕ çинче вара унăн яланах кăпăшка икерчĕ тата кукăль. Вăл питĕ лайăх арăм тата тăрăшуллă анне, телейлĕ асанне-кукамай. Хĕрĕ Светлана – педагог, Уфара пурăнать, ывăлĕ Алексей Красноярскра ĕçлет. Тимо­феевсене Артем тата Вадим, чиперк­ке Елизавета мăнукĕсем савăнăç кÿреççĕ. Туслă çемье – нумай аургазăшăн тĕслĕх.

Галина Васильевна июль уйăхĕнче илемлĕ юбилейне паллă тăвать. Ĕçтеше çак питĕ лайăх дата ячĕпе пĕтĕм чунтан саламлатпăр, ăна нумай çула çирĕп сывлăх, иксĕлми хастарлăх тата пархатарлă ĕçсенче çитĕнÿсем, пысăк телей тата çемье ырлăх-пурлăхĕ сунатпăр.

Лиана Карпован фотоÿкерчĕкĕ.