Ялти илемлĕх центрĕ

Шланлă ялĕнчи Алена Тимо­феева предприниматель ĕçне 45 çула çитсен тытăннă. Ял хĕрарăмне пурнăçри лару-тăру çакăн пек утăм тума хистенĕ. Кадрсене чакарнă пир­ки ĕçрен кайиччен Алена Ивановна тăван ялĕнче 20 çул тăршшĕне би­блиотекарьте ĕçленĕ. Библиотекăна хупнă, вăл ĕçсĕр юлнă. Халăха ĕçпе тивĕçтерекен центрта ăна парикма­хера вĕренме сĕннĕ.

- Ун чухне Уфара çеç вĕрентетчĕç, çемьене темиçе уйăха пăрахса хăварма пултараймарăм. Тăватă ачана пăхмаллаччĕ, килти хуçалăха тытса пымаллаччĕ, - аса илет вăл.

Çавăнпа пулас парикмахер про­фессине Стерлитамакра вĕреннĕ. Анчах вĕренÿшĕн Халăха ĕçпе тивĕçтерекен центр мар, хăй тÿленĕ.

- Парикмахер искусствине суйла­са илтĕм, мĕншĕн тесен мана çак ĕç килĕшет, тата эпĕ çынсемпе ĕçлеме юрататăп. Манăн пысăк мар опыт пурччĕ, хамăн çемьерисен çÿçне эпĕ хам касаттăм вĕт, - тет Алена Тимо­феева.

Шланлă хĕрарăмĕ хăйĕн ĕçне тытăниччен шкулта завхозра ĕçлеме те ĕлкĕрнĕ.

Вăл виçĕ çул каялла хăйĕн биз­нес-планне ăнăçлă хÿтĕленĕ, ИП уçма Халăха ĕçпе тивĕçтерекен центртан 50 пин тенкĕ суммăлăх субсиди илнĕ. Бизнеса аталан­тарма пурлăх пулăшăвĕ район администрацийĕнчен те килнĕ. Çак укçапа кирлĕ оборудовани тата сĕтел-пукан туяннă. Ентешне рай­онти паллă предприниматель Вис­сарион Игнатьев пулăшнă, парик­махер унăн киоскне арендăна илнĕ. Пĕрремĕш çул уншăн аренда укçине тÿлеттермен.

Инçетри ялсенче пурăнакансем те типтерлĕ тата илĕртÿллĕ пуласшăн. Ун патне кÿршĕллĕ Тури Бегенеш, Тальник, Семен, Шĕвĕрлĕ, Садов­ка ялĕсенчен те килеççĕ. Хакĕсем те клиентсемшĕн илĕртÿллĕ. Вĕсем район центрĕнчинчен ну­май пĕчĕкрех. Пулăшусен тĕсĕсем майĕпен анлăланса пыраççĕ. Çÿç каснисĕр тата сăрланисĕр пуçне кун­та тата куç харшисене илемлетеççĕ, ялти хĕрсемпе хĕрарăмсем мани­кюр пулăшăвне те ыйтаççĕ. Але­на Ивановна хăйĕн бизнесĕ, вăхăт иртнĕçем, анлăланассине тата ялти илемлĕх утравне çаврăнассине ша­нать. Çапла пулма перспективăсем вара пур.