„Цифрăна” майлаштарма волонтерсем пулăшĕç

Малтан июнь уйăхĕнче сÿнтерме планланă. Анчах ‘цифрăна” вăхăтлă пурте мар ăнланса илме пултарнă пирки васкамасса шут тытнă, сигнала чарса лартассине кĕркуннене куçарнă.

Цифрăллă вещание ăнланса илме аургазăсене çуркунне нумай профиллĕ колледжăн 37 студенчĕ пулăшнă. ТВ-приставкăсене тĕрĕс майлаштарма волонтерсем заявкăсем тăрăх килсене тухса çÿренĕ, ялсенче инструкципе листовка салатнă. Студентсем çуллахи каникул вăхăтĕнче те ĕçленĕ.

- Малтан пиртен пенсионерсем пулăшу ыйтрĕç пулсан, çулла дачăра пурăнакансенчен тата хулана пурăнма куçнă, анчах тăван ялĕнче сезонлă пурăнакан аургазăсенчен нумай запрос килчĕ. Вĕсен çурчĕсенче, яланхи пек, кивĕ телевизорсем лараççĕ. Çавăн пеккисем цифрăллă приставкăсăр йÿнеçтереймĕç. Пирĕн ачасем граждансен запросĕсем тăрăх оперативлă тухса çÿрерĕç, - каласа парать волонтерсен кураторĕ, çамрăксен ĕçĕсемпе ĕçлекен тĕп специалист Лиана Шаганц.

Октябрь уйăхĕнче районта ял çыннисенчен заявкăсен çĕнĕ хумне кĕтеççĕ. Студентсем вĕренÿ вăхăтĕнче ытла ирĕклĕ пулмĕç. Район центрĕнчен инçетре вырнаçнă ялсенче пурăнакансене тивĕçтерме çĕнĕ волонтерсем хатĕрлеме шут тытнă.

- Эпир аналоглă вещание чарса лартасси çинчен массăллă информаци хатĕрĕсенче тата интернет сетĕнче май пур таран нумайрах пĕлтерме тăрăшрăмăр. Çынсем çакăн пек пĕлтерÿсене тимлĕх сахал уйăрнине пурнăç кăтартать. Вещание чарса лартни çинчен нумайăшĕ сÿнтернĕ кун çеç пĕлсе юлать. Çавăнпа, ыйтусене пурне те оперативлă татса памашкăн, ял тăрăхĕсенче пурăнакан çынсен шутĕнчен волонтерсен куçăмлă ушкăнĕсене йĕркелерĕмĕр, - тет район администрацийĕн информаци пайĕн начальникĕ Эльвира Зиннуровна, вăл тата „цифрăна” куçассишĕн яваплă пулса тăрать.

Çĕнĕ волонтерсемпе вĕренÿ занятийĕ ирттернĕ. Кашнине уйрăм бейдж панă, унта унăн ятне тата хушаматне кăтартнă. Ял çыннисем çакăн пек бейждик тăрăх вĕсем ултавçăсем мар пулнине ĕненме пултараççĕ. Çаплах волонтер кам пулнине ыйтса пĕлмешкĕн 2-19-91 телефон та ĕçлĕ.

А. ВОРОНЦОВ.