Аургазă хыпарçи
+12 °С
Уҫҫӑнах
Пур хыпар та

Хăюллă пулеметчик

Наумкин ялĕнчи пĕртăван Матвеевсем фронтран орденсемпе тата медальсемпе таврăннă.

Федор Матвеев Наумкин ялĕнче çуралса ÿснĕ. Ăна 1943 çулта, 18 çул тул­тарсан, Хĕрлĕ Çара илнĕ. Дивизи Чкалов хулинче йĕркеленнĕ. Унăн отделенине станоклă пулеметран пеме вĕрентнĕ. Çар вĕренĕвĕ вĕçленнĕ хыççăн карабин, гранатăсем, пулемет тата ещĕкпе па­тронсем илнĕ, службăри юлташĕпе 52-мĕш стрелковăй полк составĕнче Кăнтăр-Хĕвеланăç фронтĕнче çапăçнă.
Хаяр, юнлă çапăçусемпе Харьков хули патне ăнăçлă çывхарнă. Федор Гаврило­вич „Максим” пулеметран вĕçĕмсĕр персе тăрса пехотăна тапăнса пыма пулăшнă. Атакăлакансем хыççăн йывăр пулемета сĕтĕрнĕ, çĕнĕ позицинчен каллех тăшмана пеме пуçланă. Хулана ирĕке кăларнă, ан­чах тытса тăма пултарайман. Нимĕçсен танк дивизийĕсем фронта татса кĕнĕ те ди­визин полкĕсене сайралатнă. Пирĕннисем пысăк çухату тÿссе чакнă, анчах пулăшу килсе çитсен фашистсен наступленине чарса лартнă.
Снаряд çурăлнипе Матвеев пуле­метчик уринчен тата аллинчен йывăр аманнă. Острогоржск хулинче çур çул сипленнĕ. Аманнине пула 1944 çулта демобилизациленнĕ, иккĕмĕш группăри инвалид пулса тăнă. Ăна I степень Отечественнăй вăрçă орденĕпе, „1941-1945 çулсенчи Аслă Отечественнăй вăрçăра Германие çĕнтернĕшĕн”, „СССР Хĕçпăшаллă вăйĕсем 50 çул тултарни”, юбилей медалĕсемпе, çаплах ырми-кан­ми ĕçленĕшĕн „Ĕç ветеранĕ” медаль­пе наградăланă. Арăмĕпе пĕрле пилĕк ача пăхса ÿстерсе воспитани панă. Ял çыннисем хăюллă салтака, çемьепе лайăх пурăннă çынна тата ывăна пĕлми ĕçчене халиччен асра тытаççĕ.
Федорăн аслă пиччĕшĕ, 1921 çулта çуралнă Сергей Матвеев, 1939 çулта Хĕрлĕ Çар ретĕнче Халхин-Гол юханшывĕ патĕнче Монгол Халăх Республикине тапăнса кĕнĕ Япони самурайĕсене хирĕç çапăçнă. Хире-хирĕç пулăшасси çинчен договора пурнăçласа, Хĕрлĕ Çар чаçĕсем çине тăрса çапăçнă, агрессор çарĕсене ар­катса тăкнă тата Монголине японсенчен тасатнă.
Сергей Гаврилович çак çапăçусенче çар опычĕ пухнă, унпа Аслă Отечественнăй вăрçăра нимĕç захватчикĕсене хирĕç çапăçусенче усăланнă. 1261-мĕш стрелковăй полкăн 415-мĕш уйрăм раз­ведка ротинче çапăçнă. Темиçе хутчен аманнă. Берлина çитнĕ. Ăна II степень Отечественнăй вăрçă орденĕпе, „1941-1945 çулсенчи Аслă Отечественнăй вăрçăра Германие çĕнтернĕшĕн”, „Хăюлăхшăн”, „Çапăçури паллă ĕçсемшĕн”, „Ĕç ветеранĕ” медальсемпе наградăланă. Харсăр развед­чик 68 çула çитсе 1989 çулта вилнĕ.
Н. ФЕДОРОВ,
педагогика ĕçĕн ветеранĕ.
Наумкин ялĕ.
Читайте нас: