Ырă кăмăллă сестра

Врачсем, фельдшерсем, медсе­страсем тата санитарсем Хĕрлĕ Çарăн 17 миллиона яхăн салтакне тата офи­церне ура çине тăратнă – аманнисен 73,3 проценчĕ тата чирлесе ÿкнисен 90,6 проценчĕ каллех строя тăнă. Çав çулсенче медработниксем хушшин­чи вилеслĕх стрелковăйсем хыççăн иккĕмĕш вырăнта пулнă.

Асавпуç ялĕнче çуралса ÿснĕ пирĕн анне, асанне, ват асанне Антонина Еремеевна Ларионова фронтра медсе­стра пулнă. Ăна ăннă, çапăçу хирĕнчен сывă таврăннă... Вăл хресчен çемйинче çуралнă. Çамрăклăхра Антонина Уфара медицина сестрисен икĕ çуллăх шкул­не пĕтернĕ. БашНаркомЗдрав 1940 çулта ăна Кугарчă районне ĕçлеме янă. Пĕр çултан нимĕç фашисчĕсем пирĕн çĕршыва тапăннă. Вăрçă пуçлансан Антонинăна тÿрех Кугарчăри çар ко­миссариатне чĕнтернĕ те июльте фрон­та ăсатнă. 22-мĕш арми составĕнчи 170-мĕш стрелковăй дивизине, 154-мĕш медсанбата лекнĕ.

Вăл дневник çырса пынă, ăна пире асăнмалăх хăварчĕ.

Вăрçă хыççăн аннене пысăк мар Макар ялне ĕçлеме янă. Пирĕн атте Ташлăкуль ялĕнче çуралса ÿснĕ, вăл та хресчен çемйинчен. Треппел шкулĕнче тăхăр класс пĕтернĕ. 1943 çулта ăна Хĕрлĕ Çара илнĕ. Югос­лавинче, Чехословакинче, Венгрин­че, Австринче çапăçнă. Вăрçă хыççăн ăна çарта хăварнă. Пилĕк çултан çеç демобилизациленнĕ. Таврăннă хыççăн каллех Треппел шкулне вĕренме кайнă, унта вăтам пĕлÿ çинчен ат­тестат илнĕ. Унтан Уфари ялхуçалăх институтне бухгалтер-счетовод специальноçпе вĕренме кĕнĕ. Ан­чах мĕнле-тĕр сăлтава пула вĕренме пăрахнă та Кăрмăскалăра счетоводсен курсне пĕтернĕ. Ялсовет секретарĕнче ĕçлеме тытăннă. Ăна кÿршĕллĕ ялсене те кайса çÿреме тивнĕ. Пĕррехинче вăл юлташĕсемпе Макар ялне кайнă, пирĕн анне ĕçлекен медпункта кĕнĕ. Атте çавăнта шурă халатлă илемлĕ медсе­страпа паллашнă. Часах ăна качча тух­ма ыйтнă.

Вĕсем 1952 çулта мăшăрланнă, Ташлăкуль ялĕнче пурăнма тытăннă. Анне медсестра пулса ĕçленĕ, атте - колхозра счетовод-бухгалтерта. Кăшт вăхăтран пĕрин хыççăн тепри виçĕ ывăл çуралнă.

Пирĕн çемье туслă пурăнчĕ, пире тĕрĕс воспитани пачĕç. Атте 1983 çулта вилсе кайрĕ, анне унран чĕрĕк ĕмĕре яхăн нумайрах пурăнчĕ. Вĕсем тÿрĕ кăмăллă, ахаль çынсемччĕ. Вĕсене ялйыш хисеплетчĕ. Шел пулин те, пурнăçпа ăслăланнă вĕсен куçĕсенчен урăх пăхма тата вĕсене Çĕнтерÿ уявĕ ячĕпе саламласа пулмасть. Эпир хамăрăн аттепе аннен паттăрлăхне асра тытатпăр, мăнаçланатпăр, вĕсен çутă сăнарĕсене чĕресенче упратпăр.

Халĕ Ларионовсен ăрăвĕнче çичĕ мăнук, мăнукĕсен тăватă ачи пур. Мăнукĕсенчен пĕри, Виктория, асламăшĕн çулĕпе кайрĕ, халĕ Стерли­тамак хулинчи больницăра ĕçлет.

Çапăçу хирĕнчен таврăннă ентеш­сен ячĕсене пулас ăрусем валли упра­са хăварасси – пирĕн тивĕç. Вăрçă ветеранĕсен хисепĕ чакса пырать. Вĕсемпе ырă кăмăллă тата тимлĕ пу­лар. Аслă Çĕнтерĕве питĕ пысăк хакпа кĕрешсе илнĕ аттесене тата аннесене, пиччесене тата аппасене яланах асра тытар.