Аургазă хыпарçи
+18 °С
Пӗлӗтлӗ
Пур хыпар та
Лайăх хыпар
6 Октябрӗн 2020, 14:25

Р. Хабиров: Илемлĕ, типтерлĕ район, уй-хирсене акнă

Республика Пуçлăхĕ Ватă çынсен кунĕнче районта икĕ фельдшер-акушер пунктне уçнă çĕре килчĕ.

Вĕсенчен пĕри Таштамак ялĕнче уçăлчĕ. Фельдшер-акушер пункчĕ икĕ ял – Таштамак тата Усман – халăхне тивĕçтерсе тăрĕ. Вĕсенче 790 çын пурăнать, çав шу­тра 135 ача тата 150 пенсионер.
- Лайăх кăмăл-туйăм илес килчĕ, сирĕн пата хăнана ФАПсе­не уçнă çĕре килме шутларăм, - ăшшăн саламларĕ таштамаксене Радий Хабиров.
Район администрацийĕн пуçлăхĕ Зуфар Идрисов ял çыннисене савăнăçлă событи ячĕпе саламларĕ.
- Сире сывлăх сунатăп, çĕнĕ ФАПа профилактикăна çеç кил­се çÿрĕр. „Сывлăх сыхлавĕ” наци проектне реализациленине пула юлашки çулсенче ял тăрăхĕсенче модуль йышши ФАПсене пĕрин хыççăн теприне ĕçе кĕртеççĕ. Çулталăк вĕçĕ тĕлне вĕсем Кивĕ Ибрай, Тукай тата Усман ялĕсенче пулса тăрĕç. Виçĕ çул хушшинче çакăн пек тата тăхăр модуль май­лаштарса лартăпăр, - терĕ Зуфар Явдатович.
Подряд организацийĕ - „СБС- Строй” ООО – вунă уйăх хуш­шинче 67 тăв. метр лаптăклă çирĕп кирпĕч çурт туса лартнă. Ăна туса лартма тата медицина оборудованийĕпе тивĕçтерме ре­спублика бюджетĕнчен 6,5 мил­лион тенкĕ тăкакланă. Вĕри шыв ирттернĕ, „ăшă урай” система тунă. Ялти медицина центрĕ пат­нелле тикĕс асфальт çул илсе пы­рать. Ăна ДРСУ ĕçченĕсем сарнă. Çак ĕç валли район бюджетĕнчен 1,2 млн тенкĕ уйăрнă.
Медучрежденине 33 çул ĕç стажĕллĕ Людмила Тимофеева ертсе пырĕ, тасалăха тата йĕркелĕхе Райфа Васильева санитарка асăрхаса тăрĕ. Вĕсем çак кунхине пархатарлă ялйышран нумай салам тата чечексем илчĕç.
- Сире сипленме вырăн пултăр тесе, эпир ял медицине çĕнĕрен çĕклеме шутлатпăр, – терĕ Радий Фаритович. - Республика çакăн пек çынсем çинче тытăнса тăрать. Вĕсем - чи чаплă çынсем, - палăртрĕ вăл, Людмила Витальевнăна государство награди пама тăратма хуш­са. – Район мана питĕ килĕшрĕ. Илемлĕ, типтерлĕ, уй-хирсене акнă. Пирĕн ялсем аталанччăр, вĕсенче çынсене пурăнма хăтлă пултăр тесе, эпир мĕнпурне тума тăрăшăпăр.
Республика руководителĕ фельдшер, акушерка кабинечĕсене, процедура тата суран çыхмалли пÿлĕмсене пăхса тухрĕ.
Кăрманайри акушер-фельдшер пунктне визит та уяв лару-тăрăвĕнче иртрĕ. Вăл 600 яхăн çынна тивĕçтерсе тăрĕ, çав шутра Кивĕ Абсалям ялĕнче пурăнакансене те. Ялсем çывăхра вырнаçнă. Çавăнпа медицина пулăшăвĕ илме абса­лямсем çуран та çитме пултараççĕ.
Объекта тăвасси çавăн пекех суммăна ÿкнĕ.
ФАП заведующийĕ, опытлă ме­дик Ильмира Абуталипова хăйĕн мĕнпур пациенчĕн те тенĕ пек чир историне пĕлет.
Радий Хабиров Кăрманайри ватăсемпе хутшăнчĕ. Аслă ăрăвăн сывлăхне упрама тата активлăхне пулăшма тĕллеттернĕ программăсене пурнăçлани çинчен каласа пачĕ, аургазăсене хумхан­таракан ыйтусем çине хуравларĕ.
Читайте нас: