Эпĕ килĕп

Василий Шихранов.

Сывлăм шывĕ пулса эпĕ килĕп

Ирсерен, çут тĕнче вăрансан!

Хам çуралнă çĕре тупма пĕлĕп

Вăл мана асĕнче упрасан!

Сар хĕвелĕн шевли эпĕ пулăп

Ăшăтма манайми кĕтесе.

Сарă кайăк пулса эпĕ юрлăп

Каçсерен таврана илĕртсе.

Хурăн шывĕ пулса эпĕ тумлăп

Çуркунне çĕр çине таврăнсан.

Ытарми вырăна эпĕ сумлăп

Чĕремре сăвăсем çуралсан!

Сарă тулă пĕрчи пулса шăтăп

Ăшăнсан тăван ен тăприсем.

Çĕнĕрен вăй илсе калчаланăп

Юррине пуçласан тăрисем!

Шурă çĕмĕрт çеçки эпĕ пулăп

Çуллахи шăрăха сивĕтсе.

Çутĕ уйăх пулса эпĕ тулăп

Пĕвере сăнăма чÿхесе.

Тăван çĕрĕн пилне эпĕ илĕп

Тепĕр хут çуралса çĕр çине.

Пурпĕрех çаврăнса эпĕ килĕп

Çакĕнта, Сарă Кун тĕнчине!

Читайте нас:

Телефон

834745 (2-18-45)

Электронлă почта

[email protected]

Адрес

453480, Аургазинский район, с.Толбазы, ул.Первомайская,10

Реклама пайĕ

834745 (2-01-67)

Редакци

834745 (2-18-45)

Кадрсен пайĕ

834745 (2-18-51)