Поэтсем ватă пулмаççĕ

Шупашкарта „Çĕнĕ вăхăт” издательствăра чăвашла пичетленсе тухнă „Çула тухатăп” поэзи пуххинче 73 сăвă тата 2 поэма вырăн тупнă. Вăл вĕсене тĕрлĕ вăхăтра çырнă. Кĕнеке авторăн умсăмахĕпе уçăлать, вăл унта хăйĕн çинчен, ăна, ял ачине, тахçанах литература пултарулăхĕпе интересленсе кайма мĕн хистени çинчен кĕскен каласа парать.

Шкул ачи чухнех сăвă çырма пуçланă, çарта службăра пулнă чухне те ун çинчен манман, район хаçатĕнче журналист, тăван ялĕнчи шкулта учитель пулса ĕçленĕ çулсенче малалла çырнă. Паянхи кун та перо алăран каймасть. Кăçал вара вăл 87 çул тултарать. Пурĕ прозăпа поэзин çирĕм кĕнекине пичетлесе кăларнă.

Александр Сергеевичăн поэзийĕ тĕрлĕ тематикăллă: тăван енри çутçанталăк илемĕ, юрату, шанăç, шанчăк, тăван халăх, чĕлхе пуласлăхĕшĕн канăçсăрланни... Вăл яланхи пурнăçра илем курма тата хавхалану тупма пĕлет. Сăввисенче пурнăç тапса тăрать. Унăн куçĕсем тата чĕри çамрăк пулни туйăнать. Паллă вырăс писателĕ, литература критикĕ Валентин Курбатов çапла каланă вĕт: „Поэтсем ватă пулмаççĕ”.

Савельев-САСăн сăввисенче ялти пейзаж картинисемпе пĕрле яланах çак çĕр çинче пурăнакан ĕççынни пур. Рифмăланă йĕркесенче вăл тырпул ĕçченĕн тата çĕр ĕçлекенĕн ĕçне, вăрçă ветеранĕсен паттăрлăхне, ялти арçын ача ĕçлеме тата вĕренме тăрăшнине мухтать. Хăй тĕлĕшпе ирони те, кулленхи пурнăçри кулăшла сценкăсем те уншăн ют мар. Унăн чылай сăвви тăрăх музыка кĕвĕленĕ, вĕсене хăйпултарулăх тата профессилле артистсем юрлаççĕ.

Хĕвел тухать тухăçран,

Анса ларать анăçра.

Кун та кирлĕ, каç кирлĕ

Çут тĕнчери пурнăçра.

Телей кĕтет кашнинех,

Анчах çакна манас мар:

Телей тени ĕлĕкрен

Çÿрет ĕçпе юнашар.

Хаклар, туссем, вăхăта,

Хамăр ĕçпе киленер.

Ĕç тума та, канма та

Пĕр-пĕринчен вĕренер.

Кун илемĕ – сар хĕвел,

Каç илемĕ – çут уйăх.

Вĕсем çунсан тÿпере

Пурнăç пырĕ чиперех.

2017 ç.