Аургазă хыпарçи
+17 °С
Пӗлӗтлӗ
Пур хыпар та
Çемье
13 Ноябрӗн 2020, 16:50

Çемьере килĕшÿлĕх пулсан

Çемье çирĕп пултăр тесен, мăн асаттесен ăсне тата халăх йăлисене пăхăнмалла.

Çапла шутлаççĕ Меселпуç ялĕнче пурăнакан Анатолий тата Олеся Ефимовсем. Вĕсен çемйи пысăк, аслă хĕрĕ Анастасия 13 çулта, кĕçĕнни, Александр, виçĕ çул тултарнă. Вĕсем хушшинче - вăтам ачисем – Арина тата Алеша. Çемье пуçĕ вырăнти шкулта истори вĕрентет, нумай ачаллă анне ялти Культура çуртĕнче культоргани­затор пулса ĕçлет. Вĕсем хăйсен йăхĕн ĕмĕрхи пуянлăхĕсем çинчен вăрахчен тата интереслĕ каласа пама пултараççĕ.
Ашшĕпе амăшĕ хăйсен ачисене тăван кĕтесне тата чĕлхене юратма, аслă ăрăва тата ултавсăр ĕçе хисе­племе, йăласене уяма вĕрентеççĕ. Килĕнче вĕсем чăвашла калаçма тăрăшаççĕ.
Ефимовсен хăйсен çемье сăнĕ те пур. Вĕсем Шупашкарта ятар­ласа çемьен кашни членĕ валли наци костюмĕ туянаççĕ. Чăваш халăх тумĕпе илемлĕ пысăк çемье пĕр уявра та тимлĕхсĕр юл­масть. Вĕсем нумаях та пулмасть „Пушкăртстан халăхĕсен апачĕсем” флешмоба хутшăннă. Ăста кил хуçи арăмĕ чăваш халăхĕн йăлана кĕнĕ апачĕсем – хуплу, йăва, çăмарта кукăлĕ – хатĕрленĕ (фотоÿкерчĕк çинче). Чей ĕçме тăванĕсене пур­не те чĕннĕ, пĕтĕм çемьепе апат та тутлăрах вĕт!
Читайте нас: