Юратса тата шанса – 50 çул

Иккĕшĕ те нумай ачаллă çемьере ÿснĕ. Упăшкин çемйинче 12 ача çитĕннĕ, вăл чи асли пулнă. Арăмĕн çемйинче вара – ултă хĕрача тата тăватă арçын ача. Фрида Иглин районĕнчи Уктеево ялĕнчен, Марат – Султанмуратран. Хĕр вырăс чĕлхи учительне вĕреннĕ. Каччă Уфари автоçул техникумĕнче инженер-ме­ханик специальноçне алла илнĕ. Çамрăк Фрида Стерлитамакри педа­гогика институчĕн юлашки курсĕнче вĕреннĕ чухне Султанмурат ялне практика иртме кайнă. Галимзян Ибрагимов писателĕн тăван ялĕнче пулса курма ĕмĕтленнĕ. Шăпа вĕсене çавăнта паллаштарнă.

- Эпĕ куç умне кăтра çÿçлĕ тата кăвак куçлă арçын сăнарне ÿкереттĕм, эпĕ ăна тĕл пултăм, - кулăпа аса илет вăл.

Çамрăксем тырă пушатнă çĕрте паллашнă. Марат „Урак” колхозра водитель пулса ĕçленĕ.

- Эпĕ ăна пĕрремĕш хут курнă чухне вăл илемлĕ прическăпаччĕ, таса тата типтерлĕччĕ. Тÿрех питĕ килĕшрĕ, - каласа парать çемье пуçĕ.

Вĕсем пĕр-пĕрне тÿрех килĕштернĕ, анчах Фрида качча тухма васкаман. Практика хыççăн Кăрмăскалă районĕнче ĕçлеме пуçланă. Марат икĕ çултан ăна илме кайнă. Вĕсем часах туй тунă. Фри­да Гумеровна 82 №лĕ професси училищинче учитель пулса 40 çул ытла ĕçленĕ. Вăл „ПР тава тивĕçлĕ вĕрентÿ ĕçченĕ” тата „ПР техника профессийĕн вĕрентĕвĕн отличникĕ” ята тивĕçнĕ. Марат Галимзянович сельхозтехникăра 44 çул тăршшĕне çул-йĕр юхăм хăрушсăрлăхĕн инженерĕ пулса ĕçленĕ. „ПР авто­транспорт отличникĕ” ят пур. Юби­лярсем – РФ ĕç ветеранĕсем.

Халĕ мăшăрăн пысăк çемье: икĕ хĕр, виçĕ мăнук тата мăнукĕн пĕчĕк ачи. Вĕсем – вĕсен пурнăçĕнчи чи юратнăскеррисем.

- Хутшăнусенче чи кирли – пĕр- пĕринпе тимлĕ пулни, çур сăмахран ăнланни, мăшăрна тата тăвансене пурне те хисеплени, – каласа парать Фрида Гумеровна телейлĕ пурнăçĕн вăрттăнлăхĕсене.

Ылтăн юбилярсемшĕн юрату тата шанчăклăх хăйсен çемье пурнăçĕнче çирĕп тĕрек пулса тăнă. Çавă çамрăк ăрушăн тĕслĕх пулса тăрать.